متخلطوش بزاف مراجع واساتذة اليوت يوب بيسك كل واحد وطريقته ومنهجيته وراح تتلفلكم كامل تبعو استاذ القسم ومنبعد استاذ الكور
بالنسبة للمواد العلمية ننصحكم بليكور فلفيزيا ورياضيات مع انجاز تمارين الكور قبل ماتفتحوهم عند الاستاذ وتحاولو فيهم بزاف وتكتبو بزاف ملاحظات في كراس منظم وخاص بكل مادة
(مثلا: اشتقاق دالة تكتبها بالدارجة عادي نضرب ونقسم ونطلع ونهبط، مثلا دراسة دالة تشرح كفاه تخدمها، مثلا في المجاميع تع متتاليات تكتب كل مجموع كفاه تخدمو) اكتبو ابسط الملاحظات لي تحسو رواحكم تحتاجوها سيرتو من لحلول تع تمارين بيسك تلقاو بزاف اسئلة وتتكرر وكاين لي متتكررش نظموهم كامل بيسك معا لخر مستحيل راح تعاودو تحلو 200 تمرين راح تراجعو الحلول فقط
حلو بزاف تمارين ومتحلوش التمارين الاجنبية ونتاع المغرب وحلو بكالوربات وامتحانات مراسلة وامتحانات اشبال الامة ورتبو حلولكم ووراقيكم كامل
واخدمو ملخصات لأهم القوانين ونظموهم
(التنظيم هو كلش نا كنت منظمش ولقيت روحي خاسرة )
بالنسبة للعلوم تبعو معا استاذ القسم وحظرو الدرس،بزااااف وحلو تمارين الكتاب وبالنسبة لتحضير الدرس لازم تحلل الوثائق وحدك في الدار وتقرا الدرس مليح وتجاوب على الأسئلة وكلش من الكتاب باه تتعلم المنهجيات وتولي تجري فيها ولازم تحب المواد بيسك ساهلين ومكاش لي ميديش فيهم بالنسبة للمراجع حلو تمارين بوالريش ومتعتامدوش على الحل تاعو مدو لأساتذتكم يصححولكم والبكالوريات السابقة واعتامدو على التركيز ولازم تخدمو وحدكم باه تتعلمو واذا كان استاذك في القسم مليح مديرش لي كور فيها وسقسي الاستاذ لازم كي تحضر درسك اكتب اي اسئلة تحيك في بالك ولو تافهة اي سؤال اكتبو في. مؤخرة الكراس لابغا مهوش مفيد وكي تبع الدرس معا الاستاذ كاين اسئلة تلقا اجابتهم وكاين لي تسقسيه فيهم ووسع خيالك وتخيل كلش لازم الدرس تاكلو في القسم وقبل الفروض والاختبارات لازم تهضم العلوم وأقرا من بزاف ملخصات متعتامدش على الحفض الأصم اكتب وارسم ولون وكأنك تشرح لشخص آخر ودير حركات بيديك واهدر بصوت تسمعو واقرا ملخصات الدروس من كتب ومن نت ومن ملخصات اساتذة كثر بزاف منهم مجرد قراءة والله راح تستفادو